淺談日本勞動問題 二

呢排唔知大家有冇睇新聞。日本最近有個東大畢業生過勞自殺。

係日本有個term叫過勞死。簡單講即係做到死。而通常都存在黑心企業,今日都想輕談下呢類勞動問題既發展。以下都係我上堂聽下,又睇下書歸納出黎自己既感想。

 

相信大家都知道日本人認真既工作精神。其實勞動同教育係有好密切既關係,工作到底係幾時開始變到家陣咁,個個都望入公司做社會齒輪,就係源於教育開始係咁樣教。

係日本初有大學既時候,基本上大學既目的其中一個就係培養一群可以進入同一所職場入面為公司打拚既人,日本整體既教育其實比起香港咁,谷你班蛋散死背野,教你地一堆技能,日本係更重視培育「人」。所以你見佢地德育教育幾好。

但係,調返轉頭,佢地既教育,就滲透左果種係日本既民族心理,就係團體性同服從性。

槍打出頭鳥,要合群,團體合作努力去勝利。要對上司,長輩既恭敬,呢類階級制度,我地好多外國人本身就對日本人有咁既印象,而事實你睇返佢地教育,本身,就係咁教佢地。

 

變左就係佢地一畢業出來就真係做社會齒輪,我上篇講過,佢地冇技能都唔緊要,最緊要忠誠。變相就係轉工係幾困難既一件事。今次呢件過勞自殺,好多香港人睇完可能會覺得。

轉過份工味得囉。 

老實,我都覺得最直接解決方法其實係咁。香港人大把人頂唔順就轉工啦,我係香港做廢青果陣何嘗唔係。

但係係日本,轉工,特別新入職快轉工,係好難再搵到公司請,之前有套動畫,就上一季,叫relife,個主角就係新入職三個月唔夠辭工,結果之後搵唔到工做フリータ。日本係好重視空白期,好重視忠誠,咁易轉工,唔係咁易搵到另一份,變相就係硬食。

其次職場文化欺凌,今次自殺果位係東大畢業生入廣告公司做。仲要一流大企,佢係網上都留言過話自己俾上司鬧,欺凌各樣,實際上我之前提過,工作欺凌係你有問題,唔係人地唔會無啦啦咁做。東大生到底自己係點我唔知,但係佢面對既職場欺凌,相信其實都聽唔少。但日本仔遇到都係硬食。我覺得其中原因係,自己東大生,讀書果陣叻,又東大,出黎發覺實際能力同讀書唔同結果俾同事玩。第二係,廣告公司個個都有壓力,係佢頂唔順。

事實上計返ot的話,香港好多人o得癲過日本,做會計果d更加啦。我以前個住天水圍既朋友做會計,睇住佢返工生活真係慘過食屎,人地味又一樣生活到。但係我地香港人,係捱慣。

以前日本仔其實都係咁,但近呢幾件勞動法律有改善,男女又平等左,日本既工作模式都變左。係以前有段時期叫就職冰河期,就因為泡沫經濟果陣日本失業率上升,好多後生仔都搵唔到正職,局住做フリータ,而企業都開始慣左係請一群非正規既員工,貪佢地夠平又唔洗負太多責任。

由果陣起,好多後生既勞動方式轉左,變左唔一定做正社員先可以生存。後黎演變到家陣咁,由於可以請一班廉價既非正規員工頂你地正社員。正社員為左要表現,就加大左工作壓力。家陣日本有大量黑心企業出黎係因為家陣個工作模式變左。以前既工作模式係,你作為公司一員,要為公司服務。而家陣其實好多人心態係打份工,但都被好似以前咁要求極強既忠誠,變相就有衝突。

後黎日本有套電影叫『ブラック会社に勤めてるんだが、もう俺は限界かもしれない』,主要就講日本黑心企業問題,對日本勞動有興趣既人可以睇睇。

之前睇左本書叫『若者と労働』,主要就講日本社員既構造。社員,係被指作公司既一員,而唔係被傭用你出錢我出力咁簡單,係要你都係呢間公司既一份子咁,但家陣,有邊個會咁做丫。佢地通常「就社」多過就職,即係其實做咩野位都好,總之就想去果間公司做。跟住果間公司,正社員其實好曖昧,工作內容範圍薪金都係好唔透明,公司決定,俾著香港,會計做會計野文員做文員野,分得清清楚楚,咩野位置咩野薪金一開頭講明,但日本,就係正社員,社員做咩?唔知,等公司話事,人工?公司話事。

所以佢地個勞動模式係好古怪,外國人好難明。

 

日本仔其實我覺得比我地香港人唔捱得,其中一個原因係佢地到正式出黎做野之前都基本上完全有人照顧唔洗面對社會,有幾多大學生係要好似香港大學生咁同政府借錢讀書,有幾多係讀大學係要自己pt賺生活費,真係十隻手指數得哂。

曾經有人話過我,唔可以令我自己做標準,因為我身邊既朋友冇咩正常人。即係呢我身邊好多都係高登一年一度鬥慘大賽可以參賽果類朋友黎,但我自己唔係。當我識得多呢類人,再去日本,真係發覺佢地好幸福。

住,同父母住,好多時有自己房,更唔好話搬出黎,日本租平過香港,做pt都可以handle到搬出去住,你香港就空間都冇,一係就局住住劏房。食,你打一個鐘既pt夠你食餐好既已經。我唔知家陣香港後生點,但日本後生我覺得佢地係可以放好多時間係娛樂,好多時間係興趣上面,就算興趣係要洗錢都可以有屋企人支持,香港有幾多人可以做到。返工俾人屌,常識吧,日本鬧人冇粗口,香港鬧到你祖宗十八都仲有,可能有人覺得心理壓力唔同,咁的確,冇得比,我地俾人屌開冇壓力,咁佢地唔慣俾人屌嘛。

冇錯,我地就係捱慣,而佢地,捱唔慣,社會造左一個好大壓力既環境俾佢地,但係佢地都冇係教育或者人生入面學點樣面對呢類壓力或者逆境,結果就導致自殺率咁高,又好易走牛角尖,呢個係我結論。

可能有人會覺得我偏激或者係好以偏蓋全。當然,我由寫果陣已經講,全部都我個人立場,我個人所見既感想。唔認同既唔緊要,反正人人都有唔同際遇識唔同人。又或者可能我係間咁既大學,而大學風氣係咁,對比起我以前I大差天共地啦。不過我到家陣,查實都覺得日本勞動好有問題,但我都會留低。

捱慣嘛。

廣告

淺談日本勞動問題 二” 有 4 則迴響

  1. 巴打你好,我都係香港人,諗住下年10月去讀一年語言學校,我仲未睇哂你D BLOG,但都想問多D關於日本留學既野,方唔方便私下聯絡? THX

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s